Нефть маҳсулотлари ва ёнилғи-мойлаш материали эксперизаси

Нефть маҳсулотлари ва ёнилғи-мойлаш материаллари экспертизасини ўтказиш зарурати ўзини ёқиб юбориш, қасддан ўт қўйиш, эҳтиётсизлик натижасида содир қилинадиган ёнғин, йўл-транспорт ҳодисалари, жасадни ёқиб юбориш, турли жиноят изларини йўқотиш мақсадида объектларга  ўт қўйиш, нефть маҳсулотлари ва ёнилғи-мойлаш материалларини ўғирлаш билан боғлиқ бўлган жиноий ишларни кўришда туғилади.

Нефть маҳсулотлари ва ёнилғи-мойлаш материаллари экспертизаси амалиётининг таҳлили, суд-тергов идоралари ходимлари бу объектлар хусусиятлари ва табиати ҳақида етарлича маълумотларга эга бўлмаганликлари оқибатида ашёвий далилларни экспертизага тайёрлаш, экспертиза тайинлаш ва саволларни тузишда кўп хатоларга йўл қўйишларини кўрсатади.

Нефть маҳсулотларини ва ёнилғи-мойлаш материалларини ҳар хил идишлар (бутилка, канистра ва бошқалар)да ҳамда буюмларда (кийимдаги доғлар, транспорт воситалари ва қуролдаги қатламлар) қолган юқи (излари) экспертизасининг далилий моҳияти шундаки, текшириш натижалари бўйича ёнғин содир бўлган жойда ва транспорт воситасида, қуролда ва жабрланувчи ёки жиноятчининг кийимида тез ёнувчи нефть маҳсулотлари, ёнилғи-мойлаш материаллари борлигини, уларнинг турини аниқлаш мумкин. Ёнилғи-мойлаш материалларининг излари уни қолдирган буюмдаги ушбу материаллар билан солиштириб уларнинг турдошлиги ва айрим вазиятларда айнан ўзилигини аниқлашга асос бўлиши мумкин.

Нефть маҳсулотлари ва ёнилғи-мойлаш материаллари криминалистик экспертизасининг натижалари воқеа муҳим тафсилотларини аниқлашда асосий роль ўйнайди. Масалан, замонавий инструментал усуллар (юпқа қатламли хроматография, газ-суюқлик хроматография, ультрабинафша ва инфрақизил спектроскопия, эмиссион-спектрал текшириш ва б.) ёрдамида ҳар хил буюмларда қолган кўз илғамайдиган, жуда кам миқдорда бўлган нефть маҳсулотлари ва ёнилғи-мойлаш материалларининг юқи (изи)ни топиш мумкин. Бу ҳол ёнғин содир бўлган жойдан олинган ашёвий далилларни текширишда ёнувчи суюқлик ишлатилганми-йўқми деган масалани ҳал этишда катта аҳамиятга эга.

Матнда хато топсангиз, уни белгилаб Ctrl+Enter тугмаларини биргаликда босинг .